O cineclube Pensamento e Sementeira (PeS) agroma no colectivo do mesmo nome en Viveiro no ano 2013 e un ano despois incorpórase á «Feciga»

O inzo do Colectivo xurdira da Agrupación Cultural Sementeira (1972—2003) e doutras asociacións culturais da mariña occidental, conservando algúns/algunhas das persoas vencelladas na actual comisión reitora. O nome do colectivo quere render honra ao xornalista viveirense máis destacado e uns dos fundadores das «Irmandades da Fala» Antón Vilar Ponte, co nome que leva unha das escolmas cos seus traballos xornalísticos.

A defensa do noso patrimonio cultural no sentido máis amplo do termo, tanto o material como o inmaterial, a defensa do patrimonio natural, da nosa lingua asemade da súa promoción e, a divulgación do coñecemento en xeral son os eixos nos que sustentan a súa programación.

A primeira proxección foi o 29 de xaneiro de 2014, un traballo de Seném Outeiro «A Fazaña da Liberdade», filme biográfico do intelectual galeguista Alexandre Bóveda.