A fundación do Cineclube de Compostela data da primavera de 2001, cando un grupo de mozos universitarios, estudantes da Facultade de Ciencias da Comunicación, comezaron a proxectar filmes en formato vídeo en dito centro.
As proxeccións duraron tres meses; cada filme ía acompañado dunha recensión na que algún deles realizaba un estudo crítico da obra, práctica que continuou desde aquela.

Esta experiencia inicial foi un ensaio do que chegaría a ser logo o cineclube, xa que nese tempo, unha vez confirmada a existencia dun público para as actividades, xurdiron as primeiras ideas e constituíronse como asociación cultural.

En xaneiro do 2002 comezou a segunda xeira do cineclube, exhibindo xa filmes en formato cinematográfico, 16 ou 35mm, todos os martes no Auditorio da Facultade de Xornalismo.

Escomezoúse a formar un fondo de vídeo, de revistas e de libros, ao cal teñen acceso os socios e socias, e que sirve como canle alternativa de achegamento ao cinema; por aquel tempo acadaron acordos con diferentes entidades, como a «Alliance Française» ou co «Goethe-Institut».

Na súa cuarta tempada houbo trocos importantes: amplioúse a duración da actividade a oito meses (de outubro a maio) e as proxeccións foron trasladadas á «sala Yago», aínda que se seguiron a facer actividades no auditorio de Xornalismo.
O mudar de espazo supuxo un incremento de público superior ao 100%, o que o situou nunha media de 190 espectadores.

Contou con acordos de colaboración co Concello de Santiago de Compostela o coa asociación Cidade Vella, e renováronse os xa existentes coa Universidade (USC) e coa «Alliance Française».

Na actualidade as proxeccións do cineclube de Compostela realízanse no centro social O Pichel, por medio de videoproxección.