O cineclube Os Papeiros desenvolve en Chantada desde fai anos, a súa actividade máis senlleira, a «Semana de Cinema». A súa peculiaridade, ao non dispor dun local axeitado, é que as súas proxeccións teñen que ser ao ar libre "aínda que chova", por ese motivo —ainda que eso non sexa unha garantía de bo tempo— concentran as súas actividades no mes de agosto, antes das festas patronais da vila.

Proxección na praza do Cantón de Chantada, no mes de agosto
Imaxe: www.culturagalega.org

O ciclo fórmano cinematografías especialmente comprometidas socialmente e co medio ambiente. Deste xeito, non é tan singular que o cineclube outorgue anualmente os «Lobo de Cinema» en colaboración coa asociación Xevale, onde se pretende destacar aquelas producións audiovisuais galegas ou portuguesas que defendan o medio ambiente.

Malia non ser en formato 35mm como a «Semana de cinema», senón en DVD porén cun excelente proxector, levan tamén edicións da «Semana Curta», na que moitas das veces, son os propios directores os que presentan os seus traballos.

O proxecto «Cinemateca Mamasunción» consiste na adquisición e a súa cesión —de balde—, de fondos cinematográficos de distintos países aos centros educativos, culturais e público en xeral.

O cineclube dispón dunha «Cinemateca con Rodas», un carriño adquirido en Alemaña, arrastrado por unha bicicleta, que percorre as rúas e instálase en distintos lugares cargado con 100 DVD de cinema africano, asiático, latinoamericano… etc, que a xente pode ver na súa casa. Os préstamos desta «Cineteca» son de balde e pódense devolver na Casa da Cultura de Chantada. A media é duns 150 préstamos ao ano, dos máis de 400 títulos dos que se compón a cinemateca.

Ademais de organizar «Cinemateca Aberta na Praza», «Curtas á Carta» na Casa da Xuventude, «Café Cinema» e «Cinema e Pintura», tamén fan obradoiros de cinema para nenos, contacontos así como diversas exposicións.

No ano 2014, nunha decidida aposta polo cinema no rural, poñen en marcha o «Cinema Palleiriso» co pretexto de dinamizar culturalmente á aldea de Garabelos (onde se asenta) por medio da montaxe nun vello palleiro dun cinema ao xeito antigo; aproveitando a efeméride da inauguración, celebrouse un «Encontro de Cineclubes» co gallo do 30 aniversario da «Feciga».