O Cineclube Dzine xurdiu grazas ao empeño do escultor Javier Iván Hita Rodríguez, cun chamamento realizado por medio dunha rede social para crear «Un novo cinema en Lalín», onde acadou xuntar a un grupo de veciñas e veciños de Lalín que senten a mesma necesidade colectiva, a divulgación da sétima arte ou tamén coñecíbel, a semellanza da segunda arte —a escultura—, a expresión artística e plástica neste caso en movemento.
O éxito que acadou a convocatoria propiciou a xénese dunha nova pantalla de cinema na capital da comarca do Deza e a nacenza do cineclube no ano 2014 como alternativa á ducia de cinemas (agora pechados) que chegou a acoller a comarca.
Da importancia e tenacidade do cineclube decatáronse deseguido, moitas das asociacións e locais da comarca coas que estableceron diferentes xeitos de colaboración (La Molinera, Prato_Do, Asociación Mocidade Kambota, Colectivo Cultural Adellís, Asociación Cutural O Naranxo…).
Resulta paradoxal que a corporación lalinense até o ano 2015, con Xosé Crespo Iglesias de rexedor e María Álvarez Paz de concelleira de Educación e Cultura, non amosaren o mesmo interese polo cineclube; con promesas e declaracións de boas intencións que á hora da verdade resultaron estériles, polo que ao non ter asegurado un local axeitado para realizar as proxeccións no concello que os viu nacer, acadaron cinéticas colaboracións nos concellos limítrofes de Rodeiro e Silleda.
Inauguraron as súas proxeccións en xuño de 2014 cunha sesión de curtas na II edición de «Realiméntate» (Lalín) e uns días máis tarde (na casa da Cultura de Rodeiro), co filme de Hayao Miyazaki «Gake no Ue no Ponyo» (Ponyo no Cantil).
A súa itinerante actividade rematou polo momento, cunha derradeira proxección no Círculo Recreativo (Casino) da vila, lugar que acolleu a programación máis estábel do cineclube (diante do desleixo das diferentes corporacións lalinenses). Agardamos, que entre o que foi o seu público, xurda algún día un compromiso coa divulgación cinematográfica e o desenvolvemento cultural na comarca para retomalo cineclube nunha nova xeira.
A última publicación do cineclube
Tocan tempos de despedida:
6 de outubro de 2017 ≣
Hoxe finaliza un capítulo máis da historia do asociacionismo en Lalín. Rematou un camiño que comezou hai 3 anos cunha convocatoria aberta a todo o mundo para ver como se podía dar resposta ás necesidades de toda unha comarca que quedaba sen cines. Así xurde como unha iniciativa cidadá o Cineclube Dzine, que dende o marco do asociacionismo tratou de buscar a implicación de tódalas persoas que sentiamos o cine como unha necesidade…